ادي خطوات للي عاوز يحضر ماستر ف المانيا
اولا لو انتي بنت روحي اسالي اهلك موافقين تسافري ولا لا عشان متعمليش كل حاجة وف الاخر يقولولك الشرف
تاني حاجة اهم حاجة ل المانيا انك متبقاش لقيط ف عشان تسافر المانيا لازم تعمل حاجة من التلاتة اولا تفتح حساب ف بنك ف المانيا وتحط فيه تمن الاف يورو ومش هتسحب منوا اكتر من 650 يورو ف الشهر او ان بباك او ممتك يجيبوا كشف حساب بنكي ليهم ف اخر ست شهور و بشكل عام لازم يبقي فالحساب اكتر من تمانين الف او اخر حاجة ان واحد مقيم ف المانيا يروح البلدية ويقلهم انا عاوز اعمل كفالة للطالب الفلاني
لو معكش حاجة من التلاتة متتعبش نفسك ومش
اقدامك غير انك تدور علي منحة
لو اهلك وافقوا تسافري ومعاكم تغطية مالية ب اي طريقة من التلاتة كمل قراية بقة
اولا تدور علي الجامعة اللي هتدرس فيها و الموقع ده هيساعدك ف انك تلاقي الجامعة ببساطة جدا بتدخل التخصص اللي بتدور عليه وبيطلعلك الجامعات وبتبتدي تشوف شروط الجامعة مصاريفها الدراسة ب انهي لغة والتقديم امتي وبينتهي امتي وكمان لينك الجامعة عشان تفاصيل اكتر
ثانيا حدد الجامعة تروح مقدم واقدامك طريقتين اولا انك بتقدم للجامعة عالطول بتجهز ورقك المطلوب منك وتحطوا ف ظرف وتظرفوا ع الجامعة
او
انك بتقدم عن طريق اليوني اسست
uni-assist ودي اغلب الجامعات بقت مخلية التقديم عن طريقها ودي بتعمل عليها اكونت وبيبقي ليك رقم ركز بقة كده تجهز الورق ده
ا- اصل شهادة تخرج بالانجليش من الجامعة
2- اصل شهادة بيان درجات بالانجليش من الجامعة 3-اصل شهادة الثانوية بالانجليش من وزارة التربية والتعليم
التلات شهادات دول تاخدهم وتروح توثقهم ف الخارجية المصرية الشهادة ب 11 جنيه وبعد كده تروح توثقهم من السفارة الالمانية وف السفارة مش مهم توثق شهادة الثانوية والتوثيق ببلاش للي بيقدم ف جامعة حكومية ف المانيا
نكمل بقيت الورق 4- شهادة اللغة اللي بتثبت ايجادك للغة اللي هتدرس بيها واللي مطابقة مع شرط الجامعة سواء بقة الماني او انجليش 5- عدد واحد سي في وتمضيه 6- عدد واحد موتيفيشن ليتر وتمضيه ده بتكتب فيه ليه عاوز تدرس ف المانيا 6- عدد اتنين ريكمونديشن ليتر من دكتورين ف جامعتك 7- عدد خمس صور تلاتة ونص ف اربعة ونص 8- عدد واحد صورة باسبور 9- الابلكيشن الخاص ب التقديم ع دراسة ماستر ف الجامعة واللي بتعملوا من علي يوني اسست بتمشي الخطوات عادي و تملي بياناتك و ف الاخر الموقع بيحفظلك الابليكيشن علي جهازك تطبعوا وتمضيه)
جهزت ورقك تروح محول سبعين يورو ليوني اسست ودي تكلفة جامعة واحدة واي جامعة زيادة 15 يورو
نفترض انك عاوز تقدم فعشر جامعات يبقي هتعمل عشرة ابليكيشن وتطبعهم وتمضيهم وتحطهم م عالورق اللي فوق وتحول ليوني اسست 215 يورو والافضل وصل التحويل تحطوا مع الورق فوق
جهزت كل ده حط كل ده ف مظروف واظروفوا ع يوني اسست وابعت ورقك بدري عشان لو ف حاجة عاوزينها منك تقدر تبعتها وملكش دعوة بحاجة هما هيفحصوا ويبعتولك ورقك ع الجامعات االلي انت اختارتها
لو انت جايب جيد تقدر تقدم ولو انت جايب مقبول متفقدش الامل ابعت بس اختار جامعات مش معروفة واسالها الاول هينفع ولا لا يعني عموما بتختلف من جامعة لجامعة مفيش حاجة ثابتة
لو ربنا كرمك وجامعة وافقت عليك خد ورقة القبول دي مع الورقة المالية اللي اقلتلك عليها ف الاول ومعاهم شهادة اللغة والورق التاني بقة اللي طالباه السفارة واحجز ميعاد وروحلهم واديهم الورق واعمل المقابلة
ان شاء الله تاخد التاشيرة ولما تاخدها وتسافر وابقي ابعت ل اي مصري هنا لو احتاجت مساعدة
محدش هيرسملك طريقك انت بتاخد معلومة وتبتدي بيها واعتقد كل المعلومات الاساسية موجودة اعتمد بقة علي نفسك
بالتوفيق ان شاء الله
No comments:
Post a Comment