معلومات شاملة ملخصة | لدراسة الماستر في ألمانيا

معلومات عن الدراسة فى المانيا (الماستر(

مبدأيا عشان تسافر المانيا لازم تعمل حاجة من التلاتة:

- تفتح حساب ف بنك ف المانيا وتحط فيه 8 الاف يورو ومتسحبش منه اكتر من 650 يورو ف الشهر.

- والدك او والدتك يجيبوا كشف حساب بنكي ليهم ف اخر ست شهور (لازم يبقي فالحساب على الاقل 80 الف جنيه.(

- واحد مقيم فى المانيا يروح البلدية ويقول لهم: انا عاوز اعمل كفالة للطالب الفلاني.

لو مش معاك حاجه من التلاته المذكورين يبقى مفيش قدامك غير انك تدور علي منحة.

خطوات الدراسة:

اولا: تدور علي الجامعة اللي هتدرس فيها و الموقع ده هيساعدك ف انك تلاقي الجامعة بسهولة.

بتكتب التخصص اللي بتدور عليه فبتطلعلك الجامعات وهناك بتشوف شروط الجامعة ومصاريفها والدراسة ب انهي لغة والتقديم امتي وبينتهي امتي وكمان لينك الجامعة عشان تفاصيل اكتر

https://www.daad.de/deutschland/studienangebote/studiengang/en/

ثانيا: قدامك طريقتين للتقديم:

- تختار جامعة بنفسك وتجهز ورقك المطلوب منك وترسله ع الجامعة مباشرة

او

- تقدم عن طريق اليوني اسست uni-assist

دا برنامج اغلب الجامعات جعلت التقديم عن طريقه, بتعمل عليه اكونت وبيبقي ليك رقم عليه تسجل الدخول به وتعرف اخر التطورات وردود الجامعات اللى انت قدمت فيها.

الاوراق المطلوبة:

1-    اصل شهادة تخرج بالانجليش من الجامعة

2-    اصل شهادة بيان درجات بالانجليش من الجامعة

3-    اصل شهادة الثانوية بالانجليش من وزارة التربية والتعليم

 )التلت شهادات دول تاخدهم وتروح توثقهم ف الخارجية المصرية الشهادة ب 11 جنيه وبعد كده تروح توثقهم من السفارة الالمانية وف السفارة مش مهم توثق شهادة الثانوية والتوثيق ببلاش للي بيقدم ف جامعة حكومية ف المانيا(

4-    شهادة اللغة اللي بتثبت ايجادك للغة اللي هتدرس بيها واللي مطابقة مع شرط الجامعة سواء الماني او انجليش

5-    تكتب CV وتمضيه

6-    تكتب موتيفيشن ليتر وتمضيه (ده بتكتب فيه ليه عاوز تدرس ف المانيا)

7-    عدد اتنين ريكمونديشن ليتر من دكتورين ف جامعتك

8-    عدد خمس صور تلاتة ونص ف اربعة ونص

9-    عدد واحد صورة باسبور

10-                       الابلكيشن الخاص ب التقديم ع دراسة ماستر ف الجامعة

(بتعملوا من علي يوني اسست بتمشي الخطوات عادي و تملي بياناتك و ف الاخر الموقع بيحفظلك الابليكيشن علي جهازك تطبعوا وتمضيه)

جهزت ورقك تروح محول 75 يورو لـ يوني اسست ودي تكلفة جامعة واحدة واي جامعة زيادة 15 يورو.

نفترض انك عاوز تقدم فعشر جامعات يبقي هتعمل عشرة ابليكيشن وتطبعهم وتمضيهم وتحطهم مع الورق اللي فوق وتحول ليوني اسست 215 يورو والافضل وصل التحويل تحطوا مع الورق فوق.

لما تجهز كل المذكور فوق ده ارسله على يوني اسست

ابعت ورقك بدري عشان لو ف حاجة ناقصه فى ورقك تقدر تبعتها وملكش دعوة بحاجة هما هيفحصوا ويبعتولك ورقك ع الجامعات اللي انت اختارتها

لو انت جايب تقدير جيد او افضل تقدر تقدم وانت مرتاح

ولو انت جايب مقبول متفقدش الامل ابعت بس اختار جامعات مش معروفة واسألها الاول هينفع ولا لا يعني عموما بتختلف من جامعة لجامعة مفيش حاجة ثابتة.

لو ربنا كرمك وجامعة وافقت عليك خد ورقة القبول دي مع الورقة المالية اللي قلتلك عليها ف الاول ومعاهم شهادة اللغة والورق التاني اللي طالباه السفارة واحجز ميعاد وروحلهم واديهم الورق واعمل المقابلة.

ان شاء الله تاخد التاشيرة