جاوبت في البوست اللي فات
عن أهم الأسئلة بخصوص الدراسة والتقديم في الجامعات الألمانية , هتكلم النهارده عن التأشيرة وتصريح السفر وبعض الأسئلة الأخري اللي وصلتني
وأحب أولاً أصحح معلومة بالنسبة لدراسة الماجستير وإنه هل لازم يكون في نفس التخصص ..... إتضح انه في تخصصات ماجستير كتير ممكن تدرسها من غير ما يكون في نفسس تخصص البكاليريوس
ايه هي شروط التقديم علي التأشيرة الدراسية؟
هتكلم عن أهم 3 شروط ومن غيرهم الحصول علي التأشيرة شبه مستحيل
1) موافقة قبول الجامعة
2) إثبات معرفة اللغة سواء ألماني أو إنجليزي حسب لغة الدراسة , لو ألماني يبقي مطلوب تقدم شهادة مستوي B1 , ولو إنجليزي يبقي شهادة TOEFL أو IELTS
3) إثبات الضمان المالي , يعني إزاي هتصرف علي نفسك طول مدة الدراسة وده ممكن من خلال 3 طرق :
1) إنك تفتح حساب بنكي مجمد في ألمانيا وتحول له مبلغ 8000 يورو , وإسمة حساب مجمد لأنه غير مسموح بالسحب أكتر من 660 يورو في الشهر (لأن الأول كانت الناس بعد ما تسافر بتحول الفلوس تاني علي بلدها) .
2) إنك تخلي والدك مثلاً أو حد تاني يكتب تعهد أنه هيضمنك مادياً لما تسافر , بس هيبقي مطلوب منه يثبت إزاي هيقدر يضمنك عن طريق إستخراج كشف حساب بنكي لمدة أخر 6 شهور بالإضافة لمفردات المرتب .
3) الطريقة التالتة إنك تخلي حد مقيم في ألمانيا يعملك تعهد بالضمان مالي , ونفسك الكلام هيبقي مطلوب منه يثبت إزاي هيقدر يصرف عليك طول مدة الدراسة .
دي أهم 3 نقط فيما يتعلق بشروط التقديم علي التأشيرة , في أوراق تانية روتينية زي الأبلكيشن وصوره شخصية وإنه يكون معاك جواز سفر صالح طول مدة التأشيرة , كلها موجودة بالظبط علي موقع السفارة بالإضافة لخطوات فتح حساب بنكي وتوثيق الأوراق وهكذا :
بالنسبة لتصريح السفر للطلبة اللي لسة محددوش موقفهم من التجنيد ؟
لو لسة محددتش موقفك من التجنيد مش هتعرف تسافر من غير تصريح سفر (بالنسبة للذكور فقط) , بس ممكن تطلع تصريح عادي بعد الحصول علي التأشيرة عن طريق الخطوات اللي جاية :
اولاً بتسجل ملف في هيئة الإشراف العلمي التابعة لوزارة التعليم العالي ومقرها في مجمع التحرير , والأوراق المطلوبة هناك هي :
موافقة قبول الجامعة وموثقة من السفارة - صوره من التأشيرة - صوره من الجواز - صورة من بطاقة الرقم القومي - صوره من قيد الميلاد - الضمان المالي - الرقم الثلاثي العسكري - شهادة 7 جند (أو 6 مش فاكر بالظبط ) , ولازم يكون سنك تحت 22 سنة لو طالع تدرس بكاليرويوس .
بعد ما بتسجل نفسك في هيئة الإشراف العلمي بتاخد ملف من عندهم بتطلع علي هيئة التنظيم والإدارة التابعة للقوات المسلحة وهناك بتعمل تأجيل للتجنيد وتصريح سفر لمدة سنة .
بالنسبالي كانت أصعب خطوة هي موضوع تصريح السفر بسبب اللف والدوران في المحروسة وكان فات 33 يوم علي التأشيرة وفات معاد الإمتحان ومش عارف أسافر , لدرجة اني بدأت أفكر احجز مكان في أول مركب طالع علي اليونان ومن هناك أسافر علي ألمانيا :D
لو لسالي كام سنة في الجامعة وعايز أطلع أكمل دراسة , هل لازم أبدأ من الأول ؟
لأ , الجامعة بتعمل معادلة للمواد لو في نفس التخصص اللي درستها وبتكمل
No comments:
Post a Comment