لأني إتسئلت كتير الفتره اللي فاتت بخصوص موضوع الدراسة في ألمانيا , فحبيت أجمع أهم الأسئلة في بوست واحد علشان تعم الفائده وأحب التنوية علي إن المعلومات دي بناءاً علي تجربة شخصية
لازم أتعلم ألماني علشان أدرس في ألمانيا ؟
لأ , بعض الجامعات تقدر تدرس فيها بالإنجليزي بشرط إجتياز إمتحان TOEFL أو IELTS
إزاي أعرف الجامعات اللي أقدر أدرس فيها التخصص اللي انا عاوزه بالإنجليزي ؟
تقدر تبحث عن التخصص من خلال موقع الهيئة الألمانية للتبادل العلمي
ايه مستوي اللغة الألمانية المطلوبة لو عاوز أدرس بالألماني ؟
علشان تقدر تدرس باللغة الألمانية لازم تجتاز إمتحان DSH أو TestDAF وده علشان تعرف تنجح فيه لازم تخلص تدرس 5 مستويات علي الأقل هما A1, A2 , B1 , B2 , C1
لازم أدرس كل المستويات دي في مصر قبل ما أقدر أسافر , يعني أعرف أقدر أتعلم ألماني في ألمانيا ؟
ممكن تخلص 3 مستويات بس لحد B1 وبعدها ممكن تكمل باقي المستويات في الجامعة وتمتحن هناك وتكمل دراسة , مش كل الجامعات تقدر تعمل فيها كده بس في جامعات كتير .
ممكن كمان تدرس الألماني من الصفر في ألمانيا عن طريق الحصول علي تأشيرة سياحية بس مشكلتها إنها أقصي مده ليها 90 يوم في مده 180 يوم يعني لو عرفت تاخدها وسافرت ال 90 يوم لازم تنزل مصر وتستني 90 يوم كمان علشان تجددها , فالأفضل انك تتعلم ألماني في مصر وتقدم علي تأشيرة دراسة مش تأشيرة سياحية , موضوع التأشيره هكتبله بوست تاني لوحده
ممكن أقدر أقدم للدراسة في ألمانيا بعد الثانوية العامة علي طول ؟
اه ممكن , بس هتدرس سنة تحضرية الأول إسمها Studienkolleg ودي بتدرس فيها مواد حسب التخصص اللي انت عايزه , يعني مثلاً لو عاوز تدرس هندسة يبقي هتدرس رياضيات , فيزياء , كيمياء , ألماني , كمبيوتر ولو هتدرس طب يبقي بدل الفيزياء هيبقي أحياء وهكذا حسب التخصص , ومحتوي المواد دي بيبقي تقريباً قريب من مستوي الثانوية العامة اللي في مصر , ودراسة السنة التحضيرية بتبقي بالألماني والمستوي المطلوب للتقديم عليها هو B1 وبعض الجامعات بيبقيB2
لازم يكون معايا ثانوية عامة ؟
لأ , ممكن لو معاك دبلوم تقدر تقدم علي طب حتي , بس لازم تدرس السنة التحضيرية الأول (راجع السؤال السابق ) والكلام ينطبق برده للثانوية الأزهرية
أقدر أتعلم ألماني فين ؟
في مراكز كتير في مصر بتقدم دورات ألماني , لكن أفضل مكان هو معهد جوتة في الدقي في القاهرة , لتفاصيل أكتر زور موقعهم :
ايه هي شروط الحصول علي قبول من جامعة ألمانية لدراسة البكالوريوس ؟
الشروط بتختلف من جامعة لجامعة , لكن بشكل عام دي الحاجات الأساسية :
1) شهادة الثانوية (أو الدبلوم) بالدرجات مترجمة للألمانية أو الإنجليزية وموثقة من السفارة الألمانية
2) شهادة مستوي اللغة الألمانية أو الإنجليزية حسب لغة الدراسة ( راجع أول سؤال )
3) شهادة درجات الكلية ( في حالة توفرها ) وبرده مترجمة وموثقة
4) صورة من جواز السفر
5) الأبلكيشن (بتحملة من موقع الجامعة)
6) رسوم التقديم في معظم الجامعات بتبقي مجانية لكن في بعض الجامعات بتطلب رسوم في حدود أقل من 50 يورو (بس نادراً جداً)
7) بعض الجامعات بتطلب حاجات تانية زي السيرة الذاتية , صوره شخصية , جواب تحفيزي للدراسة Motivation Letter
تقدر تعرف الأوراق المطلوبة بالظبط من علي موقع الجامعة
إزاي أعرف الجامعات اللي أقدر أقدم عليها التخصص اللي انا عايزه ؟
راجع السؤال رقم 2
ممكن أقدم في أي وقت ولا فيه مواعيد تقديم ؟
المواعيد بتختلف من جامعة لجامعة لكن بشكل عام في معظم الجامعات أخر معاد للتقديم للفصل الدراسي الشتوي (اللي بيبدأ في أكتوبر ) هو 15/07 , والفصل الصيفي (اللي بيبدأ في إبريل ) : 15/01
أنا جهزت الأوراق المطلوبة , إزاي أقدم علي الجامعة ؟
التقديم بيبقي عن الطريق البريد العادي أو السريع علي عنوان الجامعة ( مينفعش بالإيميل )
هل القبول سهل ولا لازم مجموع الثانوية وتقدير الكلية يكون كبير ؟
في معظم الجامعات مفيش مجموع معين مطلوب لكن الموضوع بيرجع للعرض والطلب , بمعني ان بعض التخصصات زي الطب مثلاً , عدد المقاعد الدراسية في معظم الجامعات محدوده وعدد الطلبات كتيره فبالتالي معايير القبول بتبقي عالية شوية , بس حسب ويكيبديا فيه 428 جامعة ومعهد عالي ففرصة القبول علي الأقل في جامعة واحده منهم كويسة.
ايه رسوم الدراسة في الجامعات الألمانية ؟
أولاً لازم نفرق ما بين رسوم الدراسة Tution Fees ورسوم التسجيل , رسوم الدراسة في معظم الجامعات تعتبر مجانية , بس فيه رسوم تسجيل وعن طريقها بتقدر تاخد كارت بتقدر من خلالة تدخل مكتبات ومعامل الجامعة وتركب المواصلات مجاناً وتحصل علي أكل مخفض داخل الجامعة بإلاضافة انه ممكن تاخد تخفيضات لما تيجي تقدم أو تشتري حاجات كتير . والرسوم دي بتترواح ما بين 100 يورو إلي 600 يورو للفصل الدراسي حسب الجامعة وبتدفع لما تسافر ألمانيا ومفيش فرق في الرسوم بين طالب ألماني وطالب أجنبي .
ايه هي شروط تحضير الماجستير ؟
انا معنديش معلومات كتير بالنسبة لدراسة الماجستير لأني بدرس بكالريوس حالياً بس معظم الكلام اللي ينطبق علي البكالريوس ينطبق علي الماجستير بإستثناء بعض النقط اللي هوضحها في الأسئلة القادمة.
فيه مجموع تراكمي معين علشان أحضر الماجستير ؟
المجموع التراكمي مفروض يكون بحد أدني 2.5 بنظام الدرجات الألماني ( لو الرقم بتاعك أقل معناها أن المجموع أعلي من الحد الأدني والعكس)
إزاي أقدر أحول المجموع التراكمي بتاعي لنظام الدرجات الألماني ؟
حمل الملف ده واكتب فيه النهاية العظمي والنهاية الصغري والمجموع التراكمي وهو هيحولهولك
لازم يكون الماجستير في نفس التخصص اللي إتخرجت بيه ؟
ينفع لو هتقدم علي بكالرويوس تاني لكن لو بتقدم علي ماجستير فا بصراحة معرفش (ومنطقياً لا أعتقد )
انا خدت قبول من الجامعة , إزاي أقدر أقدم علي التأشيرة ؟
موضوع التأشيره هكتبلة بوست تاني لوحده لأنه موضوع طويل شوية
البوست هنا : http://on.fb.me/17jQ3Fs
دي معظم الأسئلة اللي اتسئلت فيها الفتره اللي فاتت ولو حد عنده سؤال تاني ممكن يكتبة في التعليقات وبعتذر مقدماً لو فيه تأخير في الرد بسبب الإنشغال (وأتمني إن ميكونش فيه أسئلة شخصية ) وبأكد مره تانية ان المعلومات اللي فاتت كلها كانت من خلال تجربة شخصية وان افضل مصدر للمعلومات هو زيارة موقع الجامعة اللي هتقدم عليها أو موقع الهيئة الألمانية للتبادل الطلابي
, والهيئة لها مقر في القاهرة ممكن الإتصال بيهم أو زيارتهم
وشير لو تعرف حد مهتم بالموضوع
No comments:
Post a Comment