هو إختصار ل Deutsche Sprachprüfung für den Hochschulzugang وده معناه إختبار إتقان " رخصة " اللغة الألمانية المطلوب كشرط أساسى للدراسة فى الجامعات الألمانية للطلاب الأجانب الغير ناطقين باللغة الألمانية اللى عايزيين يدرسوا فى الجامعات الألمانية تخصص ما و هتكون اللغة الألمانية هى لغة الدراسة، و هو الإمتحان يمكن الوحيد اللى مش متاح للأجانب إنهم يمتحنوه فى بلادهم نظرا لإنه بإشراف الجامعات نفسها و ده بيخلى بعض الطلاب يعملوا ال Test DaF بديلا عنه لخفض التكلفة.
- أكثر من 90% من الجامعات والكليات والمعاهد العليا بتطلب DSH بتقدير 2 و ده تقدير بيتحسب بنسبة تراكمية 68%. الإمتحان عبارة عن أولا: جزء تحريرى بيتكون من 4 أجزاء هم مهارات الإستماع " الجزء الأهم نسبته للمجموع الكلى 30% وحصول الطالب فيه على نسبة أقل من 57% من ال 30% يعنى رسوبه فى التحريرى بالكامل و بالتالى فى كل الإمتحان" ، مهارات الكتابة و نسيبته حوالى 25% من التراكمى ، مهارات القراءة و نسبتها 30% ثم أخيرا مهارات اللغويات و قواعد اللغة و ده نسبة من التراكمى 15% فقط. ثانيا جزء شفوى يتم بناءا على إحتياز الشفوى بنسبة 57% فيما أكثر.
- الإمتحان مش صعب لكن مش سهل ، ونصيحتى لأى حد محتاج الشهادة دى كشرط لقبوله فى جامعة ما ، إنه يعمل كورس تحضيرى Vorbereitungskurs له فى أى جامعة متاح فيها الكورس " مش كل الجامعات بتقدم الكورسات دى " حتى لو مش هى نفسها الجامعه اللى ناوى يدرس فيها التخصص، وشرط غلابية الجامعات دى ان المتقدم يكون على الأقل مستواه B1 وبعض الجامعات التانية بتطلب عدد ساعات معينة أو B2 كشرط للقبول فى الكورس ده و اللى مدته بتبقى سمستر كامل مكثف جدا و فى نفس الوقت أرخص كتير جدا من أى معهد لغة خاص و فى بعض الجامعات يكاد يكون بمصروفات إدارية فقط.
- الإمتحان صعوبته بتختلف من جامعه لجامعة و لكن الشهادة فى نهاية الأمر واحدة و معتمدة فى كل الجامعات اللأمانية و النمساوية و السويسرية أيضا.
- من تجربتى الشخصية من الأفضل التحضير للإمتحان قبل الكورس نفسه و يكون الكورس عبارة عن مراجعه كويسة و بتركيز أعلى و تدريب على الإمتحان و ده فادنى كتير جدا عن طريق كذا نقطة من غيرهم أعتقد نسبة النجاح هتكون مش مضمونة و هى:
- بالنسبة لجزء مهارات الإستماع و هو أهم جزء فى الإمتحان فكانت نصيحة أكثر من مدرس هنا فى الجامعة اللى درست فيها إنى أتابع راديو Radio Funk
ومتابعة الأحداث الجارية اللى انت عندك منها الحد الأدنى و لو بلغتك الأم وهو راديو يعادل مثلا البى بى سى ،والإستمرارية هتعلّى مستوى الإستماع خاصة و أن الإمتحان عبارة عن موضوع مش تقليدى و غالبا بيبقى موضوع خبرى و معاصر كمان.
- بالنسبة لمهارات القراءة و الكتابة نفس الموضوع لكن مقالات ، جرائد يومية و محاولة الترجمة من و إلى الألمانية هيساعد كتير ده بالإضافة لحصيلة كلمات كويسة جدا هتدخلك يوميا.
- الجزء الخاص بقواعد اللغة و اللغويات فالتركيز على نقط معينة هى فى الأصل كل ما يخض امتحان ال DSH باعتباره مخصص للتعليم الأكاديمى فالتركيز بيكون على إزاى تقدر تفهم او تكتب او تعبر شفويا بنفس المعنى و لكن بطريقة مختلفة ، مثال تحويل الأسماء أفعال والعكس Nominalisierung und Verbalisierung و حاجة تانية إسمها Nebensätze und Partizipalattribute و هو تحويل الجملة افعلية من شطرين لإسمية بإستخدام الفعل كصفة " بعدين هتعرفوها بنت ال@#$%#%@%& "
- التقديم للتحضير ده بيتم عن طريق مكتب الأونى أسيست Uni Assist و ده عبارة عن وكيل لغالبية الجامعات بين الطلاب و الجامعة ، وبأبلكيشن بإسم الجامعه اللى بتقدمة و بيبقى قبول لتخصص مشروط بلغة " قبول صورى " و بيتكلف تقريبا 75 يورو للجامعة الواحد و أنصح أى حد يقد على جامعتين على الأقل ، لعل و عسى جامعة ترفض أو عدد المتقدمين يكونوا كتير ، و عموما أول أبلكيشن بيبقى بس ب 75 يورو و كل ابلكيشن تانى تكلفته 15 يورو فقط. التقديم بيبقى بما انه سمستر كامل فبيكون من نوفمبر ل 15 يناير للفصل الدراسى الصيفى اللى بيبدأ فى أبريل و من مايو ل 15 يوليو للفصل الدراسى الشتوى اللى بيبدأ فى أكتوبر.
عن تجربتى الشخصية كورس التحضير فى كل من جامعة كييل و جرايفسفالد و هالا و آخن أفضل من أى مكان تانى ، و الإمتحان نفسه ممكن تعملوه فى أى مكان من غير تحضير لو لاقدر الله أول مرة كان صعب وربنا مأردش النجاح، و تكلفة الإمتحان من 100 ل 150 يورو تقريبا.
هنا بعض روابط للجامعات اللى بتقدم الإمتحان و التحضير بطبيعة الحال:
جامعة كييل ( شمال ألمانيا )
جامعة هالا ( شرق ألمانيا )
جامعة جرايفسفالد ( شمال شرق ألمانيا )
جامعة آخن ( غرب ألمانيا )
جامعة يينا ( شرق ألمانيا )
أخيرا التحضير والإمتحان لهم فائدة عظيمة يعرفها كل واحد عملهم و بدأ دراسة فعلا فى الجامعة.
ربنا يوفق الجميع
No comments:
Post a Comment